شکوۂ جور نہ اندازِ فغاں تک پہنچے
صبر کا ہاتھ پکڑ کچھ جو زیاں تک پہنچے
Shikwa-e-Jaor na andaaz-e-fughaan tak pahunche
Sabr ka hath pakad kuch jo zayaan tak pahunche
عشق میں تم بھی تو اثبات و نفی سے گزرو
ہم کئی نقد سے گزرے جو یہاں تک پہنچے
Ishq me tum bhi to asbaat-o-nafii se guzro
Ham kayi naqd se guzre jo yahaan tak pahunche
کوششِ دید بنی سعئ پشیماں آخر
ہم بہت دور بھی پہنچے تو گماں تک پہنچے
Koshish-e-deed bani sayii-e-pashemaan aakhir
Ham bahot door bhi pahunche to gumaan tak pahunche
ایک کمزور سی ساعت تھی کہ اک دامِ اجل
ہم کہ دانستہ محبت میں جو یاں تک پہنچے
Ek kamzor si sa'at thi ke ek daam-e-ajal
Ham k danista muhabbat me jo yaan tak pahunche
مرتسم ہیں مری قسمت میں حوادث جیسے
خاک ہونے کو ہمیں برقِ تپاں تک پہنچے
Murtasim hain meri qismat se hawadis jaise
khaak hone ko hamiin barq-e-tapaan tak pahunche
از پئے پاس وفا یاد رہے یہ اک بات
دل میں آتا ہے جو ہر کچھ نہ زباں تک پہنچے
Az paye paas-e-wafa yaad rahe ye ek baat
Dil me aata ho jo har kuch na zubaan tak pahunche
ناصحا! مجھ پہ عبث ہیں یہ حکایات تری
کیوں نہ ایسا ہو کہ تو دیدہ وراں تک پہنچے
Naseha! mujh pe abas hain ye hikaayat teri
kyun na aisa ho ke tu deeda-waraan tak phunche
قصہ گو ہو کہ تو ہی کہہ دے سبھی رازِ خفی
اس سے پہلے کہ کوئی قصہ بیاں تک پہنچے
Qissa-go ho ke tuhi kahh de sabhi raaz-e-khafii
Is se pahle ke koi qissa bayaan tak pahunche
اٹھ گئی حسن کی محفل دمِ نظّارہ تمام
حیف! احمدؔ کہ نہ تم کوئے بتاں تک پہنچے
Uth gyi husn ki mahfil dam-e-nazzara tamaam
Haif! Ahmad ke na tum kooy-e-butaan tak pahunche
احمدؔ_میرانی
